હૉર્મોન્સ

હું તો મારા બાપનો દીકરો છું-

તો પછી મારી નસોમાં દીપડાનું લોહી કેમ ઘૂરકે છે?

હું તો મારી માનો દીકરો છું-

કોઈએ એની કૂખ પર લાત મારતાં

લોહીના ખાબોચિયામાં હું ઢેખાળાની જેમ 

ડફ દઈને જન્મ્યો હતો!

લોકો તો કહે છે

એ અનાથ માંસના લોચાને

અગ્નિનો કણ માનીને

આંબેડકર ઋષિના આશ્રમે ઉછેરવામાં આવ્યો હતો.

લોકવાયકા તો એમ પણ છે

કે માર્ટિન લ્યૂથર કિંગ નામના

એક શ્વેત આત્માના હોર્મોન્સ

એના રક્તમાં 'સામાજિક પ્રયોગ' રૂપે ચઢાવ્યા હતા!

એ બધું તો ઠીક,

પણ હું તો મારા દાદાનો દીકરો છું-

મારી સાળના કાંઠલામાં જીવતો બૉમ્બ લઈને

હું આ શી રમતે ચઢ્યો છું?

અરે , મારું ઝૂંપડું સળગી જશે

કે કોઈ પાડોશી દાઝી જશે તો?

તો પછી મારી રગોમાં કેવું લોહી દોડે છે?

બિચારો મારો બાપ તો મસાણિયો-

એણે બહુ મડદાં બાળ્યાં'તાં.

હું મારા બાપનો દીકરો છું-

એટલે શું મારે જીવતાં મનેખ 

બા...ળ... વા...નાં...?