બાલ સ્વયંસેવક

સમરસતાનું સૂત્ર લઈને

તેઓ દલિત વસ્તીમાં આવ્યા:

પહેલાં તો એમણે

એની ખાખી ચડડીના ખિસ્સામાં

ચોકલેટ મૂકી.

પછી મૂક્યો ચૉક.

એણે તો બાલસહજ લખ્યું:

'ભારત મારો દેશ છે

બધા ભારતીયો મારાં ભાઈબહેન છે...'

તેઓ ચોંકી ઊઠ્યા શિશુસહજ ભાતૃભાવથી!

'કથાઓ ઘડીને કહેવી પડશે આર્ય અને મ્લેચ્છની

દુષ્ટ પર ઇષ્ટના વિજય માટે સુદર્શન વગેરેની.'

હવે તો તે સવાયો હિંદુ બની

ધોળા ખમીસના ખિસ્સામાં

હોંશે હોંશે ત્રિશૂળ ખોસીને જાય છે.

શિબિરમાં,શાખામાં

સ્વયંસેવક બની.

તા.3-10-2003ના 'ટાઈમ્સ ઓફ ઇન્ડિયા'માં ખંજર,તલવાર,ભાલા,

લાઠીથી સજ્જ આર.એસ.એસ.ના બાલ સ્વયંસેવકોની પ્રગટ થયેલી તસવીરથી સ્ફૂરિત.