પટેલ લાડુ

હળવદનો બામણીયા લાડુ તો નરી લાડુડી -

પટેલ પાવરનો વાવટો ફરકાવતો

 ઉંચે ઉંચે આકાશને આંબે એવો

 પટેલ લાડુ તો સાચ્ચે જ બન્યો

 ગીનેશ બુકમાં ગોઠવાય એવો..!

દેશવિદેશના પટેલ ગાડાં

જાણે એક્સામટા ખાબક્યાં પટેલખળામાં.

ઘી - સાકર ને મેવાથી લચપચ

 મહા મહામણ લાડુનાં દર્શન કરીને

 મોદીજીના પાંચ કરોડ ગુજરાતીઓ

 ને તોગડીયાજીના ૮૫ કરોડ હિંદુઓના

 મોમાં પાણી આવી ગયાં :

આખી દુનિયાનો અન્નદાતા

 ને સારાએ જગતનો તાત -

એનો લાડુ સૌ ને પુગે એવો,

ખાધે ખૂટે નહી એવો જ હોય ને !

સૌ ને સંભારી સંભારી

 પટેલ લાડુની પ્રસાદીના પડિયા ને

 પતરાળા વહેંચાવા માંડ્યા :

આ લંડનના લેઉઆ પટેલને ત્યાં,

આ કેનેડાના કડવા પટેલને ત્યાં,

આ આફ્રિકાના આંજણા પટેલને ત્યાં,

આ આંતરસુબાના અમીન પટેલને ત્યાં

 આ કાળી ગામના કણબી પટેલને ત્યાં,

આ કરમસદના કાછીયા પટેલને ત્યાં,

આ કેસરડીના કોળી પટેલને ત્યાં,

આ કોંગ્રેસના કેશુભાઈ પટેલને ત્યાં,

આ બીજેપીના નરહરીભાઈ અમીનને ત્યાં..

આ દુધિયા ડેરીના માલિક રબારી પટેલને ત્યાં,

આ બગસરા જવેલર્સનાં માલિક સોની પટેલને ત્યાં,

આ ગાંધીનગરના જ્યોતિષી ભીખાભાઈ જોશી પટેલને ત્યાં,

આ 'પટેલ બ્યુટી પાર્લર' વાળાં પીન્કીબેન વાળંદ પટેલને ત્યાં,

આ બરોડાના બિલ્ડર મણીભાઈ માફિયા પટેલને ત્યાં,

આ વિસનગર બેન્કના ભોળીદાસ પટેલને ત્યાં,

આ 'પટેલ પોલ્ટ્રી ફાર્મ' વાળા પ્રવીણભાઈ પટેલને ત્યાં,

આ ' નિર્દોષ બીડી ' નાં માલિક પરભુદાસ પટેલને ત્યાં,

આ કિડનીના વેપારી ડો. કરસનદાસ પટેલને ત્યાં,

આ સ્વામીનારાયણ સીડીના ડાયરેક્ટર સત્સંગીભાઈ પટેલને ત્યાં..

સૌ મોં વકાસીને જોતા રહ્યાં

 ને પટેલ લાડુ તો ૩૫ લાખની પટેલ બિરાદરીમાં વહેચાઈ ગયો.!

મોંહે મોંહે સૌ ગણગણવા માંડ્યા :

પટેલ તો અમેય છીએ, અમે કેમ નાત બહાર ?

હું ય પટેલ ભાયડો છું,

ભરૂચનો અહેમદ ભીખાજી પટેલ

 હું ય પટેલ છું,

સંજાણનો સોરાબજી બરજોરજી પટેલ

 હું ય પટેલ છું,

આણંદ ઓર્થોડોક્સ ચર્ચનો પાદરી

 રેવ.ફાધર સિલાસ જ્યોર્જ પટેલીયા..

હું ય પટેલ છું,

વ્યારાનો તમારો વેવાઈ ઓતમ આદિવાસી વસાવા પટેલ

 હું ય પટેલ છું,

 દશકોશી રોહિત સમાજના જ્ઞાતિ પટેલનો દીકરો નીરવ પટેલ

 હું ય પટેલ છું,

ઉમીયામાતાના આંગણાને અજવાળનાર વાલ્મીકી પટેલ

 હું ય પટેલ છું,

પન્નાલાલ પટેલના માનસપુત્ર કાનજીની પ્રિયતમા

 જીવીની કુખે જન્મેલું અનૌરસ સંતાન

 હું ય પટેલ છું, મુખી કે મતદાર ના હોવા છતાંય

 તારી જેમ ગામ આખાની લુખી પટેલાઈ કરું છું.

હું ય પટેલ છું,

એક વખતનો તારો શેઢા પાડોશી પાટીદાર -

મારી યે વીસ વીઘાની પાટ હતી

જે વાણિયાના ચોપડે ડુબી ગઈ..!

તને યાદ છે ?

મારી જેમ તારા ઘરનું પાણીય

વાણીયા ભરામણ પીતા નહોતા તે દી ?

તને યાદ છે ?

મારી વળગણીએ સૂકવેલી વલુરીઓ ખાઈને

આપણે છપ્પનીઓ કાળ કાઢેલો ?

તને યાદ છે ?

તારો ધોળીઓ ધોરી અને મારો કાળીઓ ધોરી

 ને આપણી સુંઢલ ..?

આદમ બાબાની ઔલાદ આપણ સૌ

આખી પૃથ્વીના પાટીદાર આપણ સૌ

તને યાદ છે ? -

પૃથ્વીને કશા આટાપાટા જ નહોતા ત્યારે તો ?

તારી નાત આટલી નાની ના કર પટેલીયા

તારી જાત આટલી ઝીણી ના કર પટેલીયા

મુઠ્ઠી ધાન માગી જા ઘરદીઠ

પટેલ લાડુ બનાવ મોટ્ટો મોટ્ટો 

માંણસદીઠ પ્રસાદી પહોંચે તેવો,

પૃથ્વીના ગોળા જેટલો..

  નયા માર્ગ / ૧૬/૦૨/૨૦૦૬