પપ્પુ

વ્હાલા પપ્પુ,

આમ તો આખી દુનિયા તારા માટે છે.

નથી કેવળ ગામના મંદિરના ઠાકરજી;

જે કૂવાને ખોદતાં તારા કાકા દટાઈ ગયા

એ ચોરાના કૂવાનું સવર્ણ પાણી;

જે ગળીઓને દાદાએ વાળીને ઊજળી કરી

એ ગલીઓની સુધરેલી ધૂળ,

જે વાડીઓને તને કૂખમાં રાખી વાવી

એ વાડીઓનાં મીઠાં ફળ;

,જે આપણા ઘર પછવાડેથી જોઈ શકાય એવી

તારા બાપે સળગાવેલી

સવર્ણોની હોળીનો ભડકો;

જેનું નામ નથી આવડતું

પણ આપણા ઘરાક કણબીને ઘેર

દર રાંધણ છઠે રંધાય છે

એ વાનીનો મોંમાં પાણી આવે એવો સ્વાદ;

જેની સાથે તારે ગિલ્લીદંડા રમવા છે

એ મુખીના છોકરાની ભાઈબંધી;

જેની પાની જોઈ તને પ્રેમ કરવાનું મન થશે 

એ નાગરની કન્યા.

પપ્પુ, આમ તો આખી દુનિયા તારે માટે છે.

અરે!દુનિયા શું-

જ્યાં લગી સવર્ણો ન પહોંચે ત્યાં લગી

આ ચાંદો-સૂરજ પણ તારા માટે છે.