હીરો

કુંડમાં ચામડાં ફેરવતાં ફેરવતાં

હીરાને હસ્તિનાપુરની ગાદી એ વિરાજેલાં

ચાવંડામાં પ્રસન્ન થઇ ગયાં

ને પ્રસાદમાં મોકલી આપ્યાં

પક્ષની કંઠી ને લોકસભાની ટીકીટ 

હીરો તો ભગવાનનો માણસ -

પાડોશીનાં ચામડાં પણ પલાળી આપે એવો પરગજુ

રોહીદાસ જેમ હીરો ય કુંડ ફેરવે

ને રટણા કરે:

રામની નહિ, પણ રાંકની.

હીરાએ તો ધોળો ઝભ્ભો .

ધોળું ધોતિયું

ને ધોળી ટોપી ચઢાવ્યા ખાદીનાં

ને ઊપડ્યો હસ્તિનાપુર.

પાર્લામેન્ટનાં એક ખૂણે

બાબાસહેબનું એક બાવલું ઊભું.

હીરો તો ભલા ભગવાનના દર્શન થતાં જ

સાષ્ટાંગ દંડવત કરવા ચત્તોપાટ સૂઈ ગયો

ને શ્લોક બોલવા લાગ્યો :

મારા નોધારાના આધાર ,

મારા ગરીબોના બેલી

મારા રાંકના રતન ,

મારા ભગવાન તારી જે,

ને પાર્લામેન્ટની લોનમાં

આ તમાશો જોઈ

સૌ હસવા લાગ્યા ખડખડાટ :

જોયું , એમ.પી.આવ્યા છે!

ખરા જાનવરને ટિકિટ આપે છે પાર્ટી!

આ આર્યાવર્તનું શાસન

આવા અક્કલના ઓથમીરને માથે?

હીરો તો જાણે અમરાપુરીમાં ભૂલો પડ્યો

હસ્તિનાપુરમાં તો હરાજી ચાલે

હિંદુસ્તાનનાં મનેખની.

એ તો હેરતમાં પડી ગયો

પાર્લામેન્ટના બખાળા જોઈ

એનો માંહ્યલો મૂંઝાયા કરે:

માળું આમને શું કહેવું-

આટલા ભણેલાં,ચાલાક   ને ચોખલિયાં લોક

ને તોય આ દેશની આ દશા!

અહીં રૈયત બધી રોકકળ કરે

ને આ ફાંદાળા હાળા   ફૂલ્યા કરે!

અમદાવાદ આવે

ને હીરાના વિરોધીઓ ઠેકડી કરે :

'હીરો ઘોઘે જઈ આવ્યો

ને દિલ્લીએ હાથ દઈ આવ્યો.'

એવામાં એકાએકગુજરાતમાં લાગી લ્હાય.

દાકતરોની ડાગળી ચસકી

ને કરી અનામતની હોળી.

હોળીમાં હરિજનોને ઝીંકે

ને કરે દેકારા:

અનામત હટાવ.

અનામત હટાવ.

હોળીમાં બળી બળી ભડથું થયાં બધાં.

હીરાનું હૈયું હાથમાં ન રહ્યું.

એનું અંતર કકળી ઊઠયું.

ફલાંગ ભરતો પવનપાવડી પર ચઢી

હીરો તો પાછો પૂગ્યો હસ્તિનાપુર.

શીતળામાનાં ઝલોલા જેવા,

રૂવે રૂંવે આગના ટશિયા ફૂટ્યા

ને દારૂખાનાની કોઠીની જેમ

હીરાના અંગ અંગમાંથી અગનફૂલ ઝરવા લાગ્યાં.

પણ ભાષણના શબ્દો ન જડે.

કાગળમાં તો કાળાકાળા મંકોડા

ને રાતીરાતી ઝીમેલો!

ગળે ડૂમો વળી વળીને ઊભરાય

ને મોઢે ફીણના ગોટેગોટા.

અચાનક હીરો તો

પીધેલા હાથીની જેમ રૂમલાયો

ને હનવા ભગવાનની જેમ

સંસદમાં કરવા માંડી હડીયાદોટી,

હીરો તો હાકોટા કરે

ને રાગડા તાણી રોવા માંડે,

એના રુદનમાં વહે રોષ ને રુધિર:

બધી બેન્ચો સળગી હીરાની હાકે-

ટ્રેઝરી બેન્ચ ને વિપક્ષી બેન્ચ.

પ્રેક્ષકગેલેરી ને પત્રકાર ગલી .

હીરાએ તો કર્યો હોબાળો

ને ડોલાવ્યો દરબાર.

ગ્રેટ પાર્લામેન્ટેરિયનોએ ઉઠાવ્યો

પોઈન્ટ ઓફ ઓર્ડર:

આ કોણ હવનમાં હાડકાં નાખે ?

સ્પીકરે ઠોકયો હથોડો વારંવાર :

ના શિસ્ત, ના સમાજ, ના શરમ ?

ગેરસંસદીય ભાષા ન ચાલે હીરા,

આ તો ઓગસ્ટ હાઉસ!

રુદન ગેરસંસદીય?

પણ હીરો જેનું નામ

ચામડિયાનો છોરો.

એણે તો સંસદનું ચામડું ચીર્યું

ને જોયું તો

સિંહના ચામડામાં છૂપાયું શિયાળ -

લુચ્ચું શિયાળ!

હીરો તો ગરબા ગાવા માંડ્યો

ગાંડો થઇ:

સંસદ તો બધી ભઈ પોલંપોલ

સંસદ તો ભઈ પોલું ઢોલ .

હીરાની દાંડી ને સંસદનું ભોલ.

હીરો ધીબે ને ખૂલે પોલ...

કાલભૈરવની જેમ નાચ્યો હીરો

સંસદના હૈયે ભર્યું બચકું

ને કોગળે કોગળે પીધુ લોહી

અલખ અઘોરીની જેમ.

હીરાના મોઢે મેલ્યું માઈક્રોફોન

હીરાના ચહેરા પર ગોઠવ્યું ફોકસ,

બી.બી.સી.નાં પડદે

હીરો તો હીરો બની ગયો.!

ગાંધીના અહિંસાવાદી દેશ

હિન્દુસ્તાનમાં હરિજનોનો હત્યા . હેડ લાઈન્સ

ગૌવધ tટાણે શંભુ ઉપવાસ કરે

ને માનવવધ ટાણે માધવ વાંસળી વગાડે

નીરોની જેમ! -

હીરાની હૈયાવરાળ બની ગઈ હેડ લાઈન્સ દેશવિદેશ.

ઘેર બધાં હીરાને વધાવવા અધીરાં:

સૂટેડ બૂટેડ ગાંધીઓ કરતાં

નાગરી નાતે નાતબહાર મૂકેલો

આ અભણ નક્સલાઇટ નરસૈંયો

ભલો ભલો.

પણ ચિંથરેવીંટ્યા રતન જેવો હીરો

ભોળો ભટ્ટાક .

અમદાવાદ સ્ટેશને ઊતરીને જુએ 

તો ખિસ્સું કતરાયેલું- 

કંઠી ને ટિકિટ ગૂમ.

ટી,સી.એ ટપાર્યો હીરાને:

'બીજી વાર હસ્તિનાપુરની ગાડીના રવાડે ચઢતો નહિ:

ચામડાં ચૂંથ્યા કર છાનોમાનો.

હીરાલાલ રણછોડભાઈ પરમાર 

(પાટણના માજી સાંસદ, ૧૯૮૦)

(૧ મે ૧૯૨૯- ૯ મે, ૨૦૨૦)

શ્રી.હીરાલાલ પરમારની સ્મૃતિ ને સલામ.